Qaqortumi inuussutissarsiutillit mittarfiup ammarneqarnerata kingorna neriuuteqarlutillu takorluugaqartut
Hotel Qaqortup paarlersua taskinik unnuisussanillu ulikkaarpoq.
Umiarsuaq Nanortalimmukaraluartoq mallerpallaaqimmat utertariaqarsimavoq. Timmisartumut ilaasussaallutik aallariartoraluartut putsernera anorlerneralu pissutaalluni kinguaattoorsimapput.
Hotelip paarlersuani Amerikamiut Kalaallit Nunaanni politikkimut tunngasunik eqqartuisut tusaaneqarsinnaapput, franskillu angalaarnissaminnut angallassisussaminnik utaqqisut aamma tusaaneqarsinnaallutik.
Taamaannerani, umiarsuarmik takornariartaammik ilaallutik takornariartut akunnittarfiup saavani talittarfiup eqqaani aqqusinikkut tunuleriiaallutik ingerlapput.
-Akunnittarfinni inissaqartitsiniarneq maannakkut ilungersunarnerpaavoq. Illoqarfiup ineriartornissaanut maannakkut ajornartorsiutaanerpaavoq. Amerlanernik unnuisarfeqalertinnagu amerlanernik illoqarfimmi unnuisoqarsinnaanngilaq, Martin H. Kristensen oqarpoq.
Sulisitsisut Kujataani - Qaqortumi Narsamilu Peqatigiiffiisa Qaqortumi sinniisua, Qaqortumi Café Kûnguamik piginnittuuvoq.
Mittarfittaap apriilimi ammarneqarnerata kingorna neriniartarfik isertoqarnerulaartalersimavoq, piginnittorli isumaqarpoq aatsaat aallartilaaginnartoq:
- Mittarfittaaq illoqarfimmi inuussutissarsiuteqartunut neriuuteqalersitsillunilu takorluugaqalersitsivoq.
Amigartooruteqarfiusimasumit aningaasaliinernut
Mittarfittaartoqarnera maannamut takornariaqartitsinerulersitsinngikkaluartoq, illoqarfimmi aningaasaliisoqarnerunera Sulisitsisuniit maluginiarneqarpoq.
- Isumalluartoqaqaaq. Angallatinut bussinullu aningaasaliissuteqarput. Inuit aningaasanik atuipput. Ingerlatsisut suliniuteqarput. Akunnittarfiliortoqarnissaanillu pilersaaruteqartoqarluni, Martin H. Kristensen oqarpoq.
Taassuma siornatigut nutaanik sanaartornissaq imminut akilersinnaasimannginnerarpaa, pissutigalugu tunisinernut akit sanaartornermi aningaasartuutininngaanniit ikinnerujuusussaammata.
- Mittarfeqalermat illuutit akii akitsugaatsiarput, immaqa 30-40 procentinik akisunerulerlutik. Tuniniagaqassappat ingerlaannaq tunineqassaaq, Martin H. Kristensen oqarpoq.
Nammineq akunnittarfimmik ingerlatsilernissaminut nunaminertamik akuersissuteqarniarluni kommunimut qinnuteqarpoq, taannalu tusarniaassutigineqarpoq.
- Kisianni immaqa ukiut arlallit aatsaat qaangiuppata amerlanernik unnuisarfeqalissaaq. Sanaartornissaa sivisussaaq taamaaleriarluni akuersissutit aamma sivisussallutik, taanna oqarpoq.
Siunissami takornariaqarneq aatsitassarsiornerlu
Kommune Kujallermi umiarsuarnik takornariartaatinut ilaasut timmisartumillu ilaallutik takornariariartut saniatigut, Kommune Kujallermi aatsitassarsiorneq Qaqortumi inuussutissarsiortunut ilaalluarpoq.
Sivisuumik illoqarfimmiittariaqanngilaq qillerisunik naapitsiniaraanni.
- Takornariaqarneq aatsitassarsiornerlu Qaqortumi siunissami inuussutissarsiutigissallugit qularnanngitsumik pingaarnerpaassapput. Inuussutissarsiornermut sunniuteqartorujussuussaaq maannalu pingaartumik aatsitassarsiortoqartillugu malugereerparput, Martin H. Kristensen oqarpoq.
Kommune Kujallermi ullumikkut aatsitassarsiornerit pingasuupput, tassaasut: maannakkut ingerlasoq kuultisiorfik Nalunaq, ukioq manna misissuiffigineqartussaq grafitimik piiaaffissaq Amitsoq aammalu siunissami aatsitassanik qaqutigoortunik piiaaffissaq Tanbreez.
- Aatsitassarsiorfimmi sulisorpassuit illoqarfimmukaasarput tamannalu ingerlatsinermut pilersuisunut pingaaruteqarluinnarpoq, taakkumi aningaasanik maani illoqarfimmi kaaviaartitsipput, Martin H. Kristensen oqarpoq.
Ataatsimut isigalugu, Sulisitsisuninngaanniit maluginiarneqarpoq Qaqortumi inuussutissarsiornikkut amerlasuut siuariartortitseqataarusunnerat.
- Aningaasanik pissarsinissap ajornartorsiutaajunnaarnera, uagutsinnut Qaqortormiunut tupinnalaarpoq. Akuersissuteqarnissaq sulisoqarniarnerlu ilungersunarnerupput. Tamanna siornatigut misigisimanngilarput, Martin H. Kristensen oqarpoq.
