Arctic Prime Fisheries aatsaat taama sinneqartooruteqartigisoq – aalisartut saarulliit kiilumut akisunerulernissaat neriuutigaat
Nunatta kujataani aalisartitseqatigiiffiup ukiuni arlalinni amigartooruteqarnini mumisillugu 61,7 millionit koruuninik sinneqartooruteqarpoq.
Qaqortumi aalisartup sinneqartoorutit saarulliit kiilumut akisunerulernerannik tamanna kinguneqassasoq neriuutigaa.
Otto-Ole Noahsen saarullinniassalluni bundgarninik ilaartuileruttorpoq. Taassuma sinerissami aalisakkeriffinnik ingerlatsisut assigiinngitsut kiilumut akigititaannik misissuisimanerarpoq, Arctic Prime Fisheriesillu saarulliit kiilumut akilernerusariaqarai taanna isumaqarpoq.
- Sinerissami aalisartoqatigut akigissaartitserujussuarput. Taava maani Qaqortumi ajoraluartumik fabrikkitta saarullinnut aki appasissuutittuaramiuk uuminaqaaq, taanna oqarpoq.
Arctic Prime Fisheries saarulliit kiilumut ullumikkut 16 koruunilersorai, Otto-Ole Noahsen oqarpoq.
Royal Greenlandip Uummannap eqqaani kiilumut akigititai assersuutigissagaanni 10 koruunit sinnerlugit akisunerusut taassuma oqaatigaa. Royal Greenlandip tunisassiorfiini saarulliit tunisat niaquerneqarlutillu erlaveerneqartartut Arctic Prime Fisheriesimi erlaviiginnarneqartarnerat ilaatigut pissutaavoq.
Taamaakkaluartorli akitsorneqartariaqartut Otto-Ole Noahsen isumaqarpoq.
- Akigissaartitsinerat avannarpasinnerusumiittut usoralugit akinik qaffagusuttaraluarpugut, kisiannili imatut kinguneqarpallaarneq ajorami, taanna oqarpoq.
Amigartooruteqarnermit sinneqartooruteqarnermut
Aalisartitseqatigiiffiup 2025-mut nalunaarusiaa naapertorlugu Arctic Prime Fisheriesip 12,3 millionit koruuninik 2024-mi amigartooruteqarnini 61,7 millionit koruuninik sinneqartooruteqarpoq.
Kaaviiaartitat 350,5 millionit koruuninngorput, ingerlatsinermilu angusat pingasoriaatinik amerlillutik 110,7 millionit koruuninngorput.
Siuariarnerali aalisartitseqatigiiffiup aningaasaqarnikkut ajornartorsiuteqarnerminik qaangiineranik isumaqanngilaq.
Aalisartitseqatigiiffiup nammineq aningaasaatai ukiup naanerani 38,5 millionit koruuniupput, ukiumullu nalunaarut naapertorlugu aalisartitseqatigiiffiup nammineq aningaasaatini tamaasa annaavai.
Ingerlatseqatigiiffiup nammineq aningaasaatai ingerlatseqatigiiffiup nammineq ingerlatsinera imaluunniit ingerlatseqatigiiffimmut piginnittup, Arctic Prime Coastal ApS-ip aningaasanik nuussineratigut iluarsineqarnissaat naatsorsuutigineqartoq siulersuisut ukiumoortumik nalunaarusiami allapput.
Ingerlatseqatigiiffiup pisortaata, Hentzar Petersenip angusat nuannaarutigai, taannali immiunneqarluni apersorneqarusunngilaq. Taassuma suleqatigisartakkatigut, matumani aalisartut angusanut tapiissuteqaqataanerannut qujassuteqarfigai.
Otto-Ole Noahsenip aalisartitseqatigiiffiup sinneqartooruteqarnera nuannaarutigaa. Tamannali akinik naammagisimaarinninnginneranut allannguinngilaq:
- Qujanarpoq soorunami sinneqartoormata. Kisiat uagutsinnut atuisunut maani Qaqortumi annermik taama akiluttortitaaqattaarneq qasunarpoq soorunami. Uku nunatsinni allani akit nalunagit qamanilu qanoq akikitsiginersut ilungersunaqaaq, taanna oqarpoq.
Royal Greenlandilli Naalakkersuisunit pigineqartup akigititaanut unammillerniarneq Arctic Prime Fisheriesip pisortaata Hentzar Petersenip ajornakusoornerarpaa, taassumali kiilumut akigitinneqartup ilaneqarnissaa neriorsuutigisinnaannginnerarpaa.
Taasumali akigitinneqartup ilaneqarnissaanik eqqarsarsinnaaneq neriorsuutiginngikkaluarlugu misissugassaqqitsippaa – tamanna aalisartup aamma neriuutigaa:
-Ilimagisimagaluarpara aki 20 koruunit sinneqalernissaa, Otto-Ole Noahsen oqarpoq.
Arctic Prime Fisheriesip Qaqortumi Nanortalimmi Kuummiunilu aalisakkanik tunitsiveqartitsisuusup katillugit 140-nik sulisoqartup 2026-mi ingerlatsinermi angusat 2025-mi angusat naligissagaat naatsorsuutigaa.
