Colombiami nunap sajorujussuarnerani inuit 111-t ajunaartut
Colombiap kitaani nunap ataasinngornermi sajunnera inuit 111-t inuunerannik naleqarpoq.
Nutaarsiassaqartitsivik Reutersip nutaarsiassiinera naapertorlugu, nunap præsidentia Abelardo de la Espriella inuiannut oqalugiaammini taama oqarpoq.
Inuit 87-it tamatuma saniatigut ajoquserput, illullu arlallit nakkaassimallutik.
Colombiami nunap sajunnerata kingorna "nuna tamakkerlugu ajunaarnersuaqarnera“ nalunaarutigineqartoq, Reuters allappoq.
AFP-ip nutaarsiassiinera naapertorlugu, Colombiap kitaani mittarfiit mikinerit arfinillit timmisartuussiunnaarallarput.
Nunap sajunnera USA-mi nunap sajunneranik misissuisarfimmit USGS-imit 7,4-mik sakkortutigisutut nalilerneqartoq, nutaarsiassaqartitsivik AFP allappoq.
Colombiami nunap sajunnerata sakkortussusaa 6,6-itut aallaqqaammut nalilerneqarpoq.
Ajoqusernerit nalilersorneqassasut
Colombiami ujarassiuunut sullississummit nalunaarut naapertorlugu, nunap sajunnera ullaaralaakkut pivoq nunallu immikkoortuata kitaani Chocómi aallaaveqarluni.
Reutersip nutaarsiassiinera naapertorlugu, nunap sajunnera illoqarfiit pingaarnersaanni, Bogotámi, sanilerisamilu Venezuelami aamma malugineqartoq, isiginnittunit nalunaarutigineqarpoq.
Chocómi nunap immikkoortuani pineqartumi guvernørip, ajoqusernerit maanna nalilersorneqartut, X-ikkut allappaa.
Nunap sajunneri kingulliit aarlerinartorsiortitsinerat illoqarfiillu pingaarnersaanni Quibdómi inuit arlallit aamma ajuqusernerat, Nubia Carolina Cordoba-Curimit oqaatigineqarpoq.
Aammattaaq Danmarkip nunanut allanut ministereqarfiata, nunap sajunnerisa kinguneri pillugit, nunamut angalaniarnermut siunnersuiffimmini mianersoqqussuteqarpoq.
Nunap sajunneranit mittarfiit attaveqaatillu allat nunap sajunneranit sunnerneqarsinnaanerat ministereqarfimmit aammattaaq ilisimatitsissutigineqarpoq.
Sumiiffimmi tassaniikkaanni tusagassiuutit, akunnittarfiup angalatitsiviilluunniit aqqutigalugit paasissutissanik nutaanik pissarsiniartarnissaq najukkamilu oqartussat malittarisassiaannik malinninnissaq, nunanut allanut ministereqarfimmit kajumissaarutigineqarpoq.
RITZAU
