Narsarsuarmiinneq imertarunnaarnissaanut ikiaroortarunnaarnissaanullu pissutaanersaasoq
- Taanna uanga puigunngisaannassavara, nuna ungagalugu, eqqissisimaffigalugu, nunagilernikuusaq qimallugu qanoq uummatinngulaarnartigisoq, Naja Poulsen oqarpoq.
Mittarfik matummat, taanna Narsarsuarmit nuuttariaqalersunut ilaavoq.
Taassuma Hotel Narsarsuarmi ineeralerisutut 2017-imit sulereerluni 66-inik ukioqarluni Qaqortumi inuuneq sungiukkuminaatsippaa.
Akunnittarfik apriilimi matummat, Narsarsuarmi suliffissaaruppoq, nuuttariaqalerlunilu.
Nuuttariaqarsinnaalluni ilisimareeraluarlugu sivisuumik upperiuminaatsillugu oqaluttuarpoq.
- Taava tikikkiartormat aatsaat iluamik upperilerpara, Naja Poulsen oqarpoq.
Naja Poulsen Narsarsuaq qimakkusunngikkaluarlugu oqaluttuarpoq. Nunaqarfik tarnikkut eqqissisimanerpaajuaannarsimanngitsumut eqqissisimaffiusoq taanna oqaluttuarpoq.
Pinngortitaq imerajuttuujunnaarnissaanut ikiaroortarunnaarnissaanullu iluaqutaasoq
Tamannalu ukiut qulingiluat matuma siorna nuukkamili atorpaa. Tamatuma siuliani Narsarsuarmiittareerpoq. Taamanili inuttut atugai allaanerupput.
- Ukioq sorleq siullermik taakaniinnikuunerlunga eqqaamanngilara. Taamanikkut imerajuttuunerup ikiaroorajuttuunerullu naligivaanga.
Naja Poulsen Narsarsuarmukannginnermini imertarunnaarniarluni ikiaroortarunnaarniarlunilu aalajangerpoq. Nunaqarfimmili inuuneq iluaqutaavoq.
- Narsarsuaq uannut tunniussaqakuloornikuuvoq. Pinngortitamiittarnera imerunnaarnernut ikiaroortarunnaarnernullu peqqutaanerpaavoq, inuunera toqqissiartuaartutut illuni.
Qajartortarnikuunngisaannaraluarluni Narsarsuarmi qajartortalerpoq. Aamma Qassiarsummut pisuttuarnerit immikkut eqqaamavai.
- Eqqissisimanarigakku, pinngortitamut angalaarlunga. Nunamut tunnganerulertarama.
Qaqortumulli nuukkami pinngortitami pisuttuarpallaarunnaarpoq. Illoqarfimmilu inuuneq allaanerujussuuvoq.
Narsarsuaq suli eqqarsaatigisaraa
KNR-ip unnukkut qulit missaanni soraaqqammersoq naapippaa.
Asaasutut ullumikkut sulivoq. Ullaakkut arfineq-pingasunut suliartoriarluni akunnerit marluk qaangiuttut nalunaaqutaq qulinut unikkallartarpoq. Taava ualikkut sisamanut suliartoqqeriarluni unnukkut qulinut soraartarpoq. Taamaammat soraavittutut misigisimaneq ajorluni oqarpoq.
Angerlarsimaffia aamma allaaneruvoq. Inia anginngilaq, ineqateqarlunilu.
- Uanga ineqateqarneq nalugakku. Uffarfik igaffillu tamakkiissat. Ippigisukuluugakku. Nuannarinnginnakku. Uanga misigisanni imminiiussuseqarpiarpasinnanga.
Narsarsuarlu imerunnaarnissaanut ikiaroortarunnaarnissaanullu iluaqutaasoq, Qaqortumi pissutsit allaanerupput.
- Taamanikkut arlariinnik ineqateqarpunga. Taavalu uanga imerneq ajorama ikiaruussaarlungalu. Taakkua ilakka akissarsiffiup nalaani imeqqusaraluaraminnga. Taava uanga naaggaartorpiaannarlugit.
Ataasiinnarmik ullumikkut ineqateqarpoq, angerlarsimaffialu imerfiuallaarunnaarsimalluni.
Naja Poulsen Eqalugaarsunneersuuvoq, Qaqortumiillattaarnikuugaluarlunilu tassani aatsaavissuaq najugaqarpoq. Illoqarfimmili nammineerluni initaarnissani taavalu ullaakkut suliartoriarluni ualikkut soraartarnissani ullumi kissaatigaa.
Narsarsuarli suli eqqarsaatigaa.
- Narsarsuaq ammaqqittuuppat, qinnuteqassagaluarpunga. Ingerlaannaq, Naja Poulsen oqarpoq.
