Ilaqutariinniippoq: Ataatat marluk ernitik iligalugit arsaattut

Timersuutini assigiinngitsuni siornatigut takuneqartareerpoq ataataq imaluunniit anaanaq qitornaminik iligisaqarluni unammisoq. Iligiinnili ataatsini ataatat marluk tamarmik ernerminnik marlunnik unammeqateqartut akuttupput.

Taamatoqqissaaq misigisaqartoqarpoq G-44-mi Qeqertarsuarmeersumi angutit Maniitsumi maanna pissartanngorniunneranni.

Iligiinnut sungiusaasuujutigaluni Nukannguaq Zeeb peqataavoq ernini Sequssuna aamma Ikuala Zeeb iligalugit. Iligisaallu Aputsiaq Olsen arsaqataavoq ernini Ulloriaq aamma Inutsiaq Olsen iligalugit.

- Immikkuullarippoq tulluusimaarnarlunilu. Aamma utersaarnarpoq peroriartorneranni sammisaqaqatigiittarsimanitsinnut arsaqatigiittarsimanitsinnullu, Nukannguaq Zeeb KNR-imut oqarpoq.

Ilaqutariinneq apeqqutaanngilaq

Iligiit tamarmik nalunngilaat sungiusaasup erneri marluk peqataasut. Immikkuullarissumillu taama pisoqarnera iligiinnut ilisimatitsissutigineqarpoq.

- Sammisaqartitsinerni suugaluartuniluunniit peqataagaangama ilaqutariinneq apeqqutaatikkusunneq ajorpara peqataasut tamaasa assigiimmik perusuttarlugit, Nukannguaq Zeeb oqarpoq.

- Unammersuarnerit sioqqullugit ataatsimoornitsinni erseqqissumik ilisimatitsivunga ilaqutariinnerput apeqqutaanngitsoq. Unammissalluta iseraangatta eqqarsarneq ajorpunga aajinnga ernera nukarleq ilittulli isigisarlugu, Nukannguaq Zeeb G-44-mi ukiuni arlalinni sungiusaasoq oqarpoq.

Aputsiaq Olsen aamma arsaqataavoq ernini Ulloriaq aamma Inutsiaq Olsen unamminermi siullermi isersimaqatigalugit. Eqqarsaataali ilaqutariinnermiigatik tassani allarluinnarmiipput.

Misilittagartuut tunniussipput

- Iligut eqqarsaatiginermut eqqarsaatiginngitsuuleraluarpara ernikka tamaasa isersimaqatigalugit, Aputsiaq Olsen KNR-imut oqaluttuarpoq.

- Aatsaat unammineq naammassiartulersoq eqqarsaatigilerpata ernikka marluk isersimaqatigalugit, Aputsiaq Olsen oqarpoq.

Ataatat ernerminnik arsaqateqarnerat G-44-mi massakkut inissisimaffimmik takutitsisuuvoq. Iligiit kinguaariit nikikkiartornerat ingerlavoq misilittagartuut Nukannguaq Zeeb aamma Aputsiaq Olsen kinguaariit tulliit piareersarneranni suleqataallutik.

- Misilittagartuut inuusunnerusunut akuunerat iluaqutissartaqarpoq. Inuusunnerit suli eqqarsartaatsikkut inerikkiartorput uagullu misilittagartoortaasut ikiorsinnaavagut unamminissamut qanoq piareersartoqarsinnaanersoq, Aputsiaq Olsen oqarpoq.

Ilaqutariinneq iligiinnermi aamma iluaqutissartaqarpoq.

- Iluaqutissartaa tassaasinnaavoq immitsinnut nalunngilluaratta ilisimaaralugu qanoq piumaffigitigisinnaanerluta. Ikioqatigiinnermi aamma taamaappoq qanigisariinnerput tassani iluaqutaasarmat, Nukannguaq Zeeb oqarpoq.

Siunissaq ungasinnerusoq isigalugu inuusunnerit piareersarneranni anguniagaavoq ukiorpassuanngortuni G-44-p angusarissaartarnerata nanginneqarnissaa.