Aaqqissuisoq akerliussutsimik takutitsineq pillugu: - Taperserneqarluni kisimiinngitsutut misiginarpoq
Amerikamiut suliffeqarfiutaat Greenland Energy Company Nunap Qeqqani uuliasiornissaminnik suliniutissatut pilersaarutaat pillugu Ittoqqortoormiini innuttaasut akerliussutsimik ippassaq unnukkut takutitsipput.
Akerliussutsimillu takutitsineq aaqqissuisumit toqqissiallaatigineqarpoq:
- Toqqissiallannaq iluaq. Aamma eqqissineruvunga taassuma kingorna, Hans Brønlund oqarpoq.
Ittoqqortoormiini inuit 100-t sinnerlugit akerliussutsimik takutitsinermut peqataanerat aaqqissuisup tupaallaatigalugulu nuannaarutigaa:
- Inoqanaarsinaq qujanartumik. Taamatut ilimaginngikkaluarakku illoqarfik tamangajassuarmi immaqa ilaapput amerlanerit ilaapput, nuanneq, taanna oqarpoq.
Illoqarfiit allat aamma tapersersuisut
Ittoqqortoormiini akerliussutsimik takutitsinissamut aaqqissuisup nunatsinni illoqarfiit arlallit tapersersuinissaannik kajumissaarpai.
Tasiilami, Qaqortumi Nuummilu Ittoqqortoormiini innuttaasunut tapersersuillutik aamma akerliussutsimik takutitsipput.
Tamannalu aaqqissuisumik nuannaarutigineqarpoq:
- Nuannerpoq aamma iluarpoq allaniit taperserneqarluni. Kisimiinngitsutut misiginarpoq taamatut taperserneqarluni, taanna akerliussutsimik takutitsinerup aqaguani oqarpoq.
Nuummi akerliussutsimik aamma takutitsisoqarnerani borgmesteri Avaaraq Olsen (IA) naalakkersuisullu siulittaasuat Jens-Frederik Nielsen (D) peqataapput.
Borgmesteri Ittoqqortoormiinukarniartoq
Kommuneqarfik Sermersuumi borgmesteri akerliussutsimik takutitsisoqarnerani oqalugiarpoq, tapersersuinissarlu pingaaruteqarnerarlugu:
- Nammineerlunga Tunumiinnikuuvunga qanorlu avinngarusimatiginersut nalunngilara. Taamaammat tapersersuinissarput pingaaruteqarpoq.
- Taama tapersersuisoqartiginera nuannaarutigeqaara Ittoqqortoormiininngaanneersunillu maaniittunik aamma unnuk manna oqaloqateqarlunga, tapersersorneqarnertik nuannaarutigaat, taanna ippassaq akerliussutsimik takutitsisoqareersimatsiartoq oqarpoq.
Kommuneqarfik Sermersuumilu borgmesterip ukiamut Ittoqqortoormiinukarnissani pilersaarutiginerarpaa:
- Ittoqqortoormiinukarnissara pilersaarutigaara ukioruli aatsaat.
- Kommuneqarfik Sermersuup naalakkersuisut oqaloqatigaat, taamaattumik ataatsimut tunuliarsinnaavugut. Ittoqqortoormiini innuttaasut tapersersornissaat pingaartippara, Avaaraq Olsen oqarpoq.
