Uummannaq tamaat qaqugu innaallagiaqalissanersoq suli nalunartoq
Illoqarfiup pingajorarterutaa suli maannamut innaallagiaqartoq, Nukissiorfinni nukissiuuteqarnermut pisortaq, Johan Danielsen paasissutissiivoq.
Innaallagissiorfiup pisinnaasai killeqarmata, inuiaqatigiinnut pingaarutillit salliutillugit innaallagissamik pilersorneqarput.
- Soorlu napparsimavik, haali, politiit, qatserisartoqarfiik taavalu pisiniarfik. Tamakku pingaarutilimmik ingerlaviusinnaasut salliuppagut.
Illoqarfiup sinnerata innaallagialersulernissaanut ajutoornermi pilersuutit, generatorit, umiarsuarmik maanna assartorneqarput. Taakkua unnugu tikinnissaat naatsorsuutaavoq.
Qanoq sivisutigissanersoq eqqoriaruminaattoq
Illoqarfiulli sinnerata innaalliagialersorneqarnissaa suli sivisunerulaassasoq, Johan Danielsen oqarpoq.
- Tikeriarpat, taava naatsorsuutigissavarput, aamma piffissaq atorneqassaaq, containerit illoqarfiup iluani inissititernissaannut ikkussorneqarnissaannullu. Taamaasilluta illoqarfiup sinnera innaallagissamik pilersorneqassaaq, Johan Danielsen oqarpoq.
Tamannali qanoq sivisutigissanersoq oqaatigiuminaatsoq, taanna nangilluni oqarpoq.
- Eqqoriaruminaappoq, qanoq sivisutigissanersoq. Aamma atortut illoqarfimmi sumut inississornissaat maannakkut pilersaarusiorneqarput.
Nukissiorfiit facebookiatigut ataavartumik nalunaaruteqartoqartassasoq, Johan Danielsen oqarpoq.
Ajutoornermi pilersuutit, generatorit, Uummannamut maanna assartorneqartut sivisuumik atorneqarnissaat naatsorsuutigineqarpoq.
