Danskit nunanut allanut ministeriata Jeff Landryp nunatsinnik tiguaaniarluni pilersaaruteqarnera qisuariarfigigaa

Donald Trumpip nunatsinnut immikkut aallartitaa Jeff Landry USA-p nunatsinnik qanoq tiguaasinnaanera pillugu ataasinngornermi oqaaseqarpoq.

Tassani USA-p nunatsinni sakkutooqarfiusimasut sakkutuulersortariaqarnerarpai.

Suleqatigiissitami Kalaallit Nunaata, USA-p Danmarkillu nunatta siunissaa pillugu pisussatut Washington D.C-mi isumaqatiginninniutigineqartut ilagaat.

Radiokkut aallakaatitassiami P1 morgenimi danskit nunanut allanut ministeriata Lars Løkke Rasmussenip (Moderaterne) oqaaseqaatinut qisuariaatai apeqqutigineqarput. 

Jeff Landry Amerikamiut præsidentianit Trumpimit nunatsinnik suli tiguaarusulluni arfininngormat oqaluttuarfigineqarsimanerarpoq. 

Lars Løkke Rasmussen tamanna paasinninnermut isumaqataavoq. 

- Trumpip isummani, tassa USA arlaatigut Kalaallit Nunaannik aqutsileruni, USA-p pitsaanerusumik inissisimalersinnaanera præsidentip suli eqqarsaatigisaraa isumaqarpunga, danskit nunanut allanut tunngasunut ministeria DR P1-imut oqarpoq.

- Taamaattoqannginnissaami akisussaaffigaarput.

Pisoq ilungersunartoq

Jeff Landryp oqaaseqarneranut tunngatillugu maanna suliniutinut arlaannik isumaqassanersoq nunanut allanut tunngasunut ministeri ersarissumik akissuteqanngilaq.

Taamaakkaluartoq Jeff Landryp atuuffia immikkuullarissuusoq oqaaseqarfigaa. Taannami immikkut aallartitatut amerikami naalakkersuisuni ilaanngilaq naalakkersuisut suleqatigiissitaannulluunniit ilaanani.

Danskit nunanut allanut tunngasunut ministeriata amerikami præsidentip tullersortaa nunanullu allanut tunngasunut ministeria kisiisa attaveqarfigisarpai. Kisianni Donald Trumpip naalakkersuisoqatinilu allanngortitsereernerata kingorna pissutsit allanngorput.

- Præsidentimut atassuteqarnera nalornissutissaanngilluinnarpoq, ilumoorlungalu tamanna uagutsinnut ilungersunarluinnarpoq, Trumpip allattoqarfiani sulisut nalinginnaasumit allaanerusumik sulipput.

- Nalunngilarput USA-mi aaqqissuussaanikkut allatut aalajangiisoqartartoq, tassanilu inuit præsidentip qanigisai tusaaneqartarput taamaalillutillu sunniuteqaqataasarlutik. Taakkunani Jeff Landry ilaavoq.

Ministeri apersorusullugu nunanut allanut tunngasunut ministereqarfik KNR-imit attavigaarput. Taamaattoqarsinnaanngitsorli taakku ilisimatitsipput.