Nutarterneqarpoq: Uummannami innaallagissamik ilaatigut pilersuisoqaqqilersoq

Nalunaaqutaq 21:35 nutarterneqarpoq - allaaserisami alleq takuuk

Uummannami ikuallattoqarpoq, KNR-ip paasissutissarsiai naapertorlugit nukissiorfik ikuallappoq. Inoqatinut attaveqaatitigut videot ikuallattumik takutitsisut maanna siammarterneqarput.

Kalaallit Nunaanni Politiit sillimasut pisortaata, Aputsiaq Hansenip tamanna KNR-imut uppernarsarpaa.

- Politiit qatserisartullu ikuallattoqarfimmiipput, qatserisartut eqqissillutik suliaqarsinnaaniassammata innuttaasut assersuinermut ataqqinninnissaannik kaammattuuteqarfigineqarput, taanna oqarpoq.

Nukissiorfiit Uummannami kallerup inneranik pilersuineq ikuallattoqarnera pissutigalugu qamingasoq facebookiminni paasissutissiissutigaat. Nukissiorfiit nalunaaqutaq ataatsimut nalunaaruteqaqqissapput.

Uummannami kommunip allaffia ikuallattoqarnera pissutigalugu aamma matoqqavoq.

Kalaallit Nunaanni politiit ikuallattumit pujungaatsiartoqarnera pissutigalugu innuttaasut matuminnik igalaanillu matoqqatitsinissaat kaammattuutigaat.

Illu ikuallattoq Uummannami qatserisartunit misissorneqarpoq tassanilu inunnik ajoqusertoqanngitsoq, Kalaallit Nunaanni Politiit tusagassiuutinut nalunaarummi allapput.

Attaviit aamma eqqugaasinnaasut

Sakkortusaaviup sarfalersorneqarnerata uninnera pissutigalugu ajutoornermi pilersuutit ikinneqartut taamaammallu attaviit eqqugaasinnaasut ajornartorsiortoqarsinnaasorlu, Tusass nittartakkami allappoq.

Nunaqarfiup Saattut piffissami qaninnermi attaveerunnissaa Tusassimit ilimagineqarpoq. tassani mobiilikkut attaveqarfiit sarfamik pilersorneqarsinnaajunnaarnermik kingorna batterimik ikumatinneqarnerat pissutigalugu.

Ikuallattoq navianarsinnaasumik pujuliortoq, Kalaallit Nunaanni Politiit Facebookimi allapput. Taamaammat innuttaasut ikuallaffiusup nalaaniittut illup iluaniiginnarnissaat kaammattuutigaat.

Pisoq Nukissiorfiit nittartagaanni aamma malinnaaffigisinnaavat.

Suliffeqarfik allakkatigut akissuteqarnermini ima allappoq:

- Pisoq massakkut tamakkiisumik paasisaqarfiginialeruttorparput Uummannamilu innaallagissamik pilersuinerup uterteqqinneqarnissaa salliullugu sulissutigaarput.

Nukissiorfiit containerit sisamat generatorinik sillimatinik imaqartut Uummannamukaanneqariartortut KNR-imut oqaatigaat. Nukissiorfiit containerit aqagu tikiunneqarnissaat neriuutigaat.

Avatangiisinut, Pinngortitamut, Nukissiuutinut Ilisimatusarnermullu Naalakkersuisoqarfiup Ilulissaniit ikiuukkiartortoqartoq oqaatigaa.

Ikuallattoqarneranut pissutaasoq suli ilisimaneqanngilaq, upalungaarsimanerli aallartinneqarpoq.

Nalunaaqutaq 17.29 nutarterneqarpoq

Nukissiorfiit Uummannami innaallagissiorfiup pilersuinera iluarsiniarlugu suliaqarput, qaquguli pilersuisoqaleqqissanersoq nalunaaqutalersinnaanagu, Nukissiorfiit Facebookikkut ataasinngornermi unnukkut allapput.

Nalunaaqutaq 19.40 nutarterneqarpoq

Avannaata Kommuniata innuttaasut nerisassiorfigisinnaasaannik ujartuillutik aallartippoq. Kommune Facebookimi allappoq.

Kommunip tamatuma saniatigut nunatsinni upalungaarsimasut tusagassiuutitigut ingerlaavartumik nutaarsiassiisarnissaat paasissutissiissutigaa.

Nalunaaqutaq 19.45 nutarterneqarpoq

- Kalaallit Nunaanni Upalungaarsimasoqatigiit pilersinneqarput, oqartussallu ingerlaavartumik suleqatigiillutik ataqatigiissaaripput. Ikuallattoqarnerani innaallagissamik pilersuineq taamatullu illoqarfimmi oqarasuaatit internettimullu attaviit unitsinneqarput. Nukissiorfiilli innaallagissamik pilersuinermik pilersitseqqinniarlutik sapinngisamik sukataarlutik suliaqarput, suliassarli annertuvoq. Illoqarfinnit allanit ajornartoornermi generatorinik pissarsiortoqarpoq, taakkulu aqagu unnukkut tikiunnissaat naatsorsuutigineqarpoq.

Kalaallit Nunaanni Upalungaarsimasut innuttaasunut, sanaartugassanik suliassinneqartartunut suliffeqarfinnullu Uummannami ajornartoornermik generatoreqartunut periarfissaqarunik taakkuninnga upalungaarsimasunut atukkeeqqullugit kaammattuuteqarput.

Uummannami timersortarfik innuttaasunut imermik kissartumillu pisariaqartitsisunut ammatinneqarpoq.

Radiokkut ingerlaavartumik nalunaaruteqassasoq

Oqarasuaatikkut attaveqartoqannginnerani politiit, peqqinnissaqarfik annaassiniarnermillu suliaqartut pisariaqartinneqassagaluarpata innuttaasunut napparsimmavimmut politeeqarfimmulluunniit ornigunnissaannik kaammattuuteqarfigineqarput.

Nukissiorfinnit nalunaaqutaq 20.30 nutaarsiassalerlugu nutarterneqarpoq

Uummannap ilaa innaallagissamik pilersorneqaleqqittoq Nukissiorfiit nalunaarutigaat.

- Tassa imeqarfimmut, Pilersuisumut timersortarfimmullu pilersuineq ingerlaqqilerpoq, Nukissiorfiit allapput. 

Nukissiorfiit Uummannap illoqarfiata sinneranut innaallagissamik pilersueqqilernissaanut sulineq ingerlavoq.

Avannaata Kommunianit nal. 21.20 nutaarsiassanik nutarterneqarpoq

Uummannami illoqarfiup ilaata ajornartoornermi generatorimit pilersorneqaleqqimmat innuttaasut katersortarfitoqaqqami nerisassiornissamut periarfissaqalersut Avannaata Kommunia KNR-imut nal. 21.20 allappoq.

Nukissiorfinnit ilalerlugu nalunaaqutaq 21.35 nutarterneqarpoq

Nukissiorfiup illoqarfiup pingajorarterutaa akunnerup tulliuttup ingerlanerani innaallagissamik pilersuleqqissallugu naatsorsuutigalugu tusagassiuutinut nalunaarutigaa.

- Inuiaqatigiinnut pingaaruteqarnerpaat uani salliunneqassapput.

Umiarsuup generatorinik arlalinnik innaallagissamik ajornartoornermi pilersuinermi iluaqutaasussanik usilerluni nikinnissaanut tungaanut pissutsit taamaassapput.

Umiarsuaq Nukissiorfiit oqarnerat naapertorlugu aqagu unnukkut tikissaaq, tamatumalu kingorna akunnerit arlallit ingerlaneranni ikkussuunneqassapput.

- Uummannami innuttaasut innaallagiaqanngitsut taamaammat aqagu unnuap qeqqata missaata tungaanut utaqqisariaqassasut, Nukissiorfiit allapput.

KNR-ip pisoq malinnaaffigaa ingerlaavartumillu nutarterissalluni.