Uummannami innuttaasut ilaat innaallagissiorfiup ikuallareernerata kingorna sillimmasersornialersaartoq
Uummannami innaallagissiorfik juunip ulluisa 22-ianni ikuallappoq, tamannalu illoqarfiup innaallagiaarunneranik kinguneqarpoq.
Maannali pissutsit nalinginnaasuusut Uummannami innuttaasoq Sakio Fleischer oqarpoq.
- Qujanartumik massakkut nalinginnaasumik ingerlaleqqavugut, taanna oqarpoq.
Naak pissutsit nalinginnaaneruleraluartut Uummannami Nukissiorfiit tamakkiisumik suli innaallagialersuilinngitsut, Nukissiorfiit Avannaani Immikkoortuani pisortaq Ove Karl Poulsen oqarpoq.
- Uummannami sarfalersorneq sisamanngorlugu agguarnikuuarput. Taavalu aamma ungasissumiik kiassarnermik massakkut kiassaagallarpugut makkua rækkehusit kiassarniarlugit, taava kisianni massakkut tamakkiisuunngilaq una atuarfik suli pilersunngilarput pissutigalugu ikuallannikut taakkua aqqusaaramigit pilersornera, taanna oqarpoq.
Suliaqartoqarnera pissutigalugu suli qamittoortoqartartoq
Uummannami innaallagissiorfiup ikuallareernerata kingorna ajornartoornermi pilersuutinik innaallagialersuisoqarpoq. Suliaqartoqarnerali pissutigalugu qamittoornerit suli pisartut Sakio Fleischerip oqaatigaa:
- Massakkumut taamatut isikkoqarpoq. Soorunami qamillattaasarnerit pisarput ilaatigut aamma massakkuugallartoq annerusumik qamillattaanera pinngilaq immaqa sarfaq atorneqartoq annikinnerummat, taanna oqarpoq nangillunilu:
- Kisianni nalunartua tassa aajuna qulliit atornerulerutsigit taarsilerpallu qanoq ingerlajumaarnersugut, kisianni neriuppunga arlaatigut ajunngitsumik aaqqiisoqarumaartoq.
Sakio Fleischerillu angerlarsimaffimmi innaallagiaarunnissaq pinaveersaartinniarlugu ukiarnissaanut sillimmasersornialersaarpoq.
- Allatut ajornartumik ukiamut piareersartariaqassuugut ilaatigut immaqa generatorinik nammineq pigisassatsinnik pisaarnissarput. Taamaalilluta aamma qulakkeerniarlugu angerlarsimaffitta sarfaqarnissaa aammalu immaqa kiassaatit ikumatinneqarnissaannut generatori taanna atorluarneqarsinnaassammat, taanna oqarpoq.
Nukissiorfiit ukiarnissaanut aamma piareersaateqartut
Inuit innaallagissamik ukiakkut atuineruleraangata innaallagissiornermi tapertaasartoq ikuallappoq, innaallagissiorfiulli pingaarnerup qaammatit marluk qaangiuppata aalaakkaanerusumik pilersuilernissaa naatsorsuutigineqarpoq.
- Immaqa una eqqaamalaassooq elværki massakkut ikuallannikoq spidslastværkimik taasarparput taanna atorunnaarpoq kisianni una gundlastværkimik taasartagarput taanna ikuallannikuunngilaq kisianni aajuna ajoqutaa spidslastværki ikuallammat aquttui ajutooqataammata, taamaattumik taakku aaqqikkutsigit aquttulerlugit aalaakkaanerusumik ingerlanissarput naatsorsuutigaarput.
Ajutoornermili pilersuutinik qaammatini pingasuni atuinissaq naatsorsuutigineqarpoq, taamaammat innaallagiamik atuisoqarnerulerpat ajutoornermi pilersuutit artorsalernissaat naatsorsuutigineqartoq Ove Karl Poulsen oqarpoq.
- Massakkuugallartumik naammattorujussuupput, massakkut aasaagami taava kisianni nalunngilarput ukiariartornerani artorsarnerulersinnaavoq taamaattumik suli tikisitseqqilaassuugut annerulaartumik, taanna oqarpoq.
Nukissiorfinniit iliuuseqartoqarnera innuttaasunut toqqissisimanartoq aammalu innuttaasut tapersersuisutut inissisimanissaat pingaaruteqartoq Sakio Fleischer isumaqarpoq.
- Nukissiorfinniit taamatut aaqqiinissamik suliaqartoqartillugu ilaatigut aamma tapersersuisutut inissisimanissarput isumaqarpunga pingaaruteqartoq, soorlu assersuutigiinnarlugu sarfatorpallaanik atuinaveersaarnissarput aamma pigutsigu tamatsinnut iluaqutaassooq taamaalilluni aamma qameqattaarnerit pinngitsoorneqarsinnaallutik, Sakio Fleischer oqarpoq.
