Uummannaq tamangajammi innaallagiamik pilersorneqaleqqittoq
Uummannaq tamangajammi, innaallagissiorfiup ataasinngormat ikuallannerata kingorna, maanna innaallagiamik pilersorneqaqqilerpoq.
Taama Nukissiorfiit nittartakkaminni pingasunngornermi ullaakkut allapput.
- Atortut ataasiakkaat teknikkikkut ajornartorsiutaat suli aaqqinniarneqarput, sumiiffiillu sinnerini pilersuinerup ataavartuunissaa qulakkeerniarneqarpoq.
Illoqarfiup ilarujussua ikuallannerup kingunerisaanik, ulluni kingullerni innaallagiaaruppoq innaallagiamillu pilersuiniarneq allanngorarluni.
- Atortut kingulliit nalimmassarneqarneri misileraaffigineqarnerilu ingerlanneqarmata suli sivikitsumik sumiiffinnilu ataasiakkaani qaminngasoqarallarsinnaavoq. Sulisugut illoqarfiup innaallagiamik tamakkiisumik pilersorneqaqqilernissaa anguniarlugu suli suliaqarput, ingerlatseqatigiiffik oqarpoq.
Inaallagissiorfik ataasinngornermi ualikkut ikuallalerpoq, umiarsuaq ajornartoornermi generatorinik, illoqarfimmi ikuallattoqarnerata kingorna innaallagiamik pilersuisussanik, usilluni Ilulissaniit marlunngornermi unnukkut tikiuppoq. Nukissiorfimmi pisortap, Johan Danielsenip ikuallannermut suna pissutaanersoq suli paasineqannginnera, KNR-imut ataatsinngornermi oqaluttuaraa.
