Issittumi Sakkutooqarfik: Nunamit illersornissaq pillugu apeqqutit maanna akissuteqarfigigaat

Bornholmimi juunimi ataatsimiititsisoqarpoq. Tusagassiuutit TV2 aamma Bloomberg, Issittumi Sakkutooqarfimmi pisortaq Søren Andersen, tassani apersorpaat.

Generalmajor oqaluttuarpoq, akeqqat rakettiinik missilinik nakkartitsisinnaasunik nunaminngaanniit silaannakkut saassunneqarnermut llersuummik Nuummut tikiussisoqassasoq.

Bloombergilu allappoq, nunaminngaanniit silaannakkut saassunneqarnermut illersuutit siulliit tikiunneqareersut.

Naalakkersuisut Kalaallit Nunaanni silaannakkut saassunneqarnissamut illersuummik pilersitsinissaq pilersaarutaanngikkallartoq, KNR-imut tamatuma kingorna oqaatigaat.

Illersornissamut ministereqarfiup silaannakkut saassunneqarnissamut illersuummik pilersitsisoqarnissaanik pilersaaruteqartoqanngitsoq, KNR-imut aamma ilisimatitsissutigaa.

- Kalaallit Nunaanni silaannakkut saassunneqarnissamut illersuummik pilersitsinissamut pilersaaruteqanngilaq. Tamanna pillugu aalajangertoqassappat, Kalaallit Nunaanni Savalimmiunilu naalakkersuisut qanimut peqatigalugit aalajangertoqassaaq, Illersornissamut ministereqarfik allappoq.

KNR-ip Søren Andersenimut oqaaseqarfiginninnerni assigiinngitsuni sorliit ilumoornersut apeqqutigaa.

Silaannakkut saassunneqarnermut illersorneq sakkussiornerlu

Oqaaseqarnerit assigiinngitsut eqqaassanngikkaanni, sakkussiornerunissamut apeqqummut atatillugu, nunaminngaanniit silaannakkut saassunneqarnermut llersuuteqarnissaq pillugu nalunaarutigineqartut tupaallaatigineqarput. 

Kalaallit Nunaannut sakkussianik illersuutinik tikiussisoqarpat tamanna aatsaat sakkussiornerussasoq, Søren Andersen KNR-imut ukioq kingulleq novembarimi oqaluttuarpoq.

- Tamakkuupput illersornissaqarfiup sakkussamaatigisai ulluinnarni maaniittussaanngitsut. Tassaappummi timmisartut sorsuutit, sakkut uniornatik eqqugaqaqqissaartartut, nunaminngaanniit silaannatigut illersuutit sakkussallu allarpassuit, Søren Andersen taamani oqaluttuarpoq. 

Issittumi Sakkutooqarfimmi pisortap, naak tusagassiuutinut allanut siornatigut allatut oqarnikuugaluarluni, Kalaallit Nunaannut nunamit silaannakkut saassunneqarnermut illersuutinik tikiussisoqalinnginnera oqaluttuaraa.  Assi © : Markus Valentin / KNR

Naak Søren Andersen Bloombergimut allatut oqarnikuugaluarluni, Illersornissamut ministereqarfiup nalunaarutaanut naapertuuttumik, Nuummi nunamiit silaannakkut saassunneqarnissamut illersuuteqannginnera KNR-imut maanna oqaatigaa.

- Imaappoq, tassa taamaattoqanngilaq, Søren Andersen oqarpoq.

- Aamma tamaani allanik sakkussiaqassanersoq danskit naalakkersuisuinit naalakkersuisuninngaanniillu politikkikkut aalajangiiffigineqassaaq.

Nunamit silaannakkut saassunneqarnermut illersuutinik pilersitsisoqarsimanngilaq, illersuutinilli atorneqarnissaminnut piareersarneqarnikuunngitsunik atortorissaaruteqarpisi? 

- Tamanna oqaaseqarfiginianngilara, Søren Andersen oqarpoq. 

USA-mit  qunusaarineq

Kalaallit Nunaata navianartorsiortinneqarneranut tunngatillugu Kalaallit Nunaannit Danmarkimillu tusarliussat assigiinngilluinnarnerat KNR-ip siorna allaaseraa.

Naalakkersuisut siulittaasuata innuttaasut toqqissisimasinnaanerat USA-llu præsidentiata oqaasii naalakkersuisunit ernummatigineqannginnerat arlaleriarluni oqaatigaa.

Tamanna ilutigalugu Danmarkimi ministeriunerup eqqissiallannissamut suli piffissaanngitsoq oqaatigaa.

Ken Howery, USA-p Kunngeqarfimmut Danmarkimut aallartitaa, Nuummi illoqarfiup qeqqani konsulatip allaffeqarfittaava nutaaq ammaanersiorneqarmat peqataavoq. USA-p Kalaallit Nunaannik tiguaaniarluni suli pilersaaruteqarnera siornatigut miserratigiumasimanngilaa. Assi © : KNR / Markus Valentin

Jens-Frederik Nielsenip (D) USA-mut tunngatillugu pissutsit KNR-imit ukioq manna januaarip 12-ianni apersorneqarnermini ‘ilungersunartutut’ oqaatigai.

Múte B. Egede (IA), nunanut allanut tunngasunut naalakkersuisoq, marsimi ima oqarpoq:

- Piffissami inuuffitsinni nunamit uagutsinnik illersuilluarnerpaatut isumaqarfigisimasatsinnit tatineqangaarpugut.

USA-p præsidentiata Donald Trumpip Amerikamiut isertortumik paasiniaasartuisa Kalaallit Nunaanni alapernaarsuiartortitaqartalernissaannik peqqussuteqarsimanera, maajimi siorna saqqummiunneqarpoq.
 

Jens-Frederik Nielsenip pissutsit ‘akuerineqarsinnaanngilluinnartutut’ taamanikkut taavai.

Taamaakkaluartoq attaveqaasersuutinut pingaarutilinnut tunngatillugu alapernaarsuiniarneq ajornakusoornerulersimavoq. Generalmajor Søren Andersen tamanna oqaluttuaraa.

Isertortukkut alapernaarsuiniarneq ajornakusoornerulersoq

Politiit isertortumik paasiniaasartuisa, PET-ip, Kalaallit Nunaanni naammassisaqarnerunissaq anguniarlugu ilasimallugu  KNR-imut januaarimi oqaluttuaraat. 

Issittumi Sakkutooqarfimmi pisortap nunami attaveqaasersuutit pingaarutillit eqqaanniinnertik pissutigalugu nunanit allanit isertortumik alapernaarsuinissap ajornarnerulernera oqaluttuaraa.

- Sumiiffinniinnitta isertortumik alapernaarsuinissaq aserorterinissarluunniit ajornarnerulersippaa. Akeqqat ajortisaarinissaat sumiiffinni nakkutiginnitsilluta ajornarnerussaaq.

- Nukissiorfiup eqqaaniitilluta kalaallisut danskisulluunniit oqalussinnaanngitsumik takusaqarutta apeqqusersuilernissarput pissutaavoq. 

Inuit nakkutigineqartussat amerlanerusoraasigit imaluunniit tassuuna allanngortoqarnani nakkutiginnissinnaasut amerliinnarpat? 

- Tamaaniittussaanngitsunik takusaqarneq ajorpugut, Søren Andersen oqarpoq.