Folketingimut ilaasortanngorlaat marluk Danmarkimukarnissaminnut piareersimasut

Naaja H. Nathanielsen (IA) aamma Qarsoq Høegh-Dam (N) folketingimukarnissaminnut maanna piareersarput.

Allattoq Ann-Sophie Greve Møller

marsip 26-at 2026 14:37

Nutserisoq Medea Olsen, Josefine Rasmussen

Qarsoq Høegh-Dam (N) aamma Naaja H. Nathanielsen (IA) Folketingimut ilaasortanngornerat pingasunngornerup unnuaani paasinarsimmat qungujulasoqaqalunilu, eqitaarisoqaqalunilu nuannaartoqaqaaq.

Tamannalu aqaguani malunnarpoq, sinnakilliortoqarmat.

- Kisianni ajornanga neriulluarpasinnerlu soorlu ulloq manna misigalugu, Qarsoq Høegh-Dam KNR-imit pingasunngornermi apersorneqarami oqarpoq.

Qinigaaqqammersut taakkua marluk unnuaq tamangajaat eqqumagaluarlutik pingasunngornermi ullaakkut suliassaqalereerput. Suniarnerlutik pilersaarusiussavaat.

Naaja H. Nathanielsen

1975-imi inunngorpoq.
1.943-nit qinigaalluni Inuit Ataqatigiit sinnerlugu folketingimut qinigaavoq. Taamaalilluni naalakkersuisuujunnaartussanngorpoq.
IA sinnerlugu Inatsisartuni 2009-mit 2016-imut ilaasortaavoq. 'Partiimit allatut aalajangertarata kingunerisaanik', IA-mit 2016-imi ilaasortaajunnaarpoq.
Pinerluttunik isumaginnittoqarfimmi 2016-imit 2021-mut pisortaavoq.
IA-mut 2021-mi uterpoq Inatsisartunullu 2021-mi qinigassanngortikkami Inatsisartunut ilaasortanngorluni. Inuussutissarsiornermut, aatsitassanut, nukissiuuteqarnermut, inatsisinik atuutsitsinermut naligiissitaanermullu naalakkersuisooreerluni, naalakkersuisutut sulinini Inatsisartunut siorna qinersisoqarnerata kingorna nangeqqippaa.

Allisiguk

Naaja H. Nathanielsen inuussutissarsiornermut, aatsitassanut, nukissiuuteqarnermut, inatsisinik atuutsitsinermut naligiissitaanermullu naalakkersuisutut tunuarpoq. Inatsisartunut siorna apriilimi qinersisoqarmalli naalakkersuisuuvoq.

- Jens-Frederik Nielseni naalakkersuisunit tunuarnissannik ilisimatittussaagakku nalunaarfigaara tassungalu tunngatillugu aamma inississugassaararpassuit isumagalugit, taanna oqarpoq.

Misissueqqissaarneq

Danmarkimi qanoq naatsorsuuteqartoqassanersoq suli nalunarallarpoq. Danmarkimi partiit naalakkersuisunngortitsinissaq pillugu isumaqatigiinniarput.

Mette Frederiksen, maanna ministeriunertut atorfeqarallartoq, kunngikkormiut sinnerlugit misissuisuuvoq. Imaappoq, kikkut naalakkersuisoqatigiilersinnaanerat massakkut misissuleruttorpaa.

Isumaqatiginninniarnerit ajornakusoorsinnaasut, sivissumillu ingerlanneqarsinnaasut, politikkikkut oqaaseqartartut arlallit ilimagaat. Atlantikup Avannaaneersut ilaasortat pingaarutilimmik suli sunniuteqassanersut suli nalunarpoq.

- Danmarkimi inissisimaffik suli nalunartumiikkaluartoq, taanna oqarpoq.

Partiip naalakkersuisut saamerlerneersut talerperlerneersulluunniit tapersersorniarneraat, isumaqatigiinniarnermi aalajangerneqarumaarpoq, nangilluni oqarpoq.

QARSOQ HØEGH-DAM

1989-mi inunngorpoq
Naleraq sinnerlugu 4.615-init taaguunneqarluni Folketingimut ilaasortanngorpoq.
Siumut sinnerlugu, 796-init taaguunneqarluni Inatsisartunut 2021-mi ilaasortanngorpoq. Ilaasortaanerminit tunuarpoq paasineqarmat hashiuteqartutut akiligassinneqarsimasoq.
Siumumut politikkikkut siornatigut siunnersortaavoq aamma partiimut siunnersortaalluni, Siumullu Nuummi immikkoortortaqarfiani siulittaasuulluni.
Siumup siulersuisa Nuummi immikkoortortaqarfik Qarsoq Høegh-Damimit siulittaasuuffigineqartoq isornartorsiorpaat, isumaqarlutik immikkoortoqarfimmi ilaasortat amerlassusaasa nalunaarsorneri pillugit peqquserluttoqartoq. Tamannalu Siumup Qasigiannguani 2023-mi ataatsimeersuarnerani saqqummiunneqarpoq.
Naleqqami partiimi siunnersortitut kingorna sulilerpoq. Naleqqami politikkikkut maanna siunnersortaavoq.
Inatsisartunut maannakkut ilaasortaasoq Folketingimilu ilaasortaasimasoq, maannakkullu qinigassanngortinngitsoq, Aki-Mathilda Høegh-Dam (D) qatanngutigivaa.

Allisiguk

Inuit Ataqatigiit aamma periarfissatik ammatippaat. IA-p Socialistisk Folkeparti, partiitut ikinngutigaat.

- Suli misissuivugut aamma Danmarkimi qanoq pisoqarnissaa takorusupparput,a Naaja H. Nathanielsen, oqarpoq.

Qaqugu Danmarkimukassanerluni suli naluaa.

- Tamaani ataatsimiinnerit nangeqqinneqassapput, soorunami aamma danskit partiivi ataatsimeeqatigineqassapput. Piffissallu ilaani Danmarkimukassaagut isumaqatiginninniariartorluta, Naaja H. Nathanielsen, oqarpoq.

Aamma atuarukFolketingimut qinersinerup inerneranut apeqqutit arlallit, suli akissutissarsinngitsut

Qinersinermi Inuit Ataqatigiit taaguunneqarnerpaavoq, tassa qinersisut 28,6 procentiisa partii qinerpaat. Naaja H. Nathanielsen 1.943-nit taaguunneqarpoq.

Qarsoq Høegh-Dam taaguunneqarluarluni 4.615-init taaguunneqarpoq. Tassa qinersiartortut 21,6 procentiisa taaguuppaat. Naleraq siullermeerluni Folketingimi ilaasortaatitaqarpoq. Aki-Matilda Høegh-Dam (N) 2022-mi Siumut sinnerlugu Folketingimi ilaasortassatut 2022-mi qinerneqarpoq, kisianni Inatsisartuni qineqqusaarnermi ukiup siuliani, Siumut qimallugu Naleqqamut ilaasortanngorpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.