Maniitsumi uuliakoorneq: Uuliap imaanut kuuttup annersaa suneqarsinnaanngilaq
Uuliap 10.000 literip missaaniittup imaanut kuuttup annersaa suneqarsinnaanngilaq. Nukissiorfiit paasissutissiipput uuliap kuuttup annerpaartaa nunap iluanut kuussangatinneqartoq.
Qatserisartut oqarnerat naapertorlugu Maniitsumi tallimanngormat uuliakoortoqarnera nakkutigineqarluarpoq.
Allattoq Jonna Enoksen Dahl
maajip 07-at 2026 11:30
Maniitsumi qatserisartut uuliap imaanut kuunera tallimanngormalli sulissutigaat.
Tankit uuliamik imallit, Nukissiorfiup innaallagissiorfiutaanut uuliamik immersuisut, aqqutaasa ilaata milittoorsimanerata kingunerisaanik uulia illorsuup eqqaanut nunamut immamullu kuulertoq, Nukissiorfimmi Qeqqata Kommuniani aqutsisup Jan Zachariassenip nassuiaatigaa.
- Ruujori nunap iluaniittoq ussiillisimavoq. Taanna aappaqartinneqarluni qajannaaqqagaluarpoq.
Ingerlatsinermut pisortap oqaatigaa, ruujori ussiitsup iluarsarnissaa pillugu Nukissiorfiit atortussanik amigaateqartoq. Pingaartumik ruujorimik amigaateqarput.
Uuliap 10 kubikmeteri missaaniittup, tassa 10.000 literip, imaanut kuuttup annersaa suneqarsinnaanngilaq. Uuliallu kuuttup annerpaartaa nunap iluanut kuussangatinneqartoq, Nukissiorfimmiit oqaatigaat.
-Dieselolia 10.000 literit missaanniittoq kuussimasoq naatsorsuutigaarput. Takusinnaasarpullu naapertorlugu 2.500 literit aamma 3.000 literit akornanni katersorsimavagut. Tassa imaappoq uulia kubikmeterit arfineq marluk (7.000 literit aaqq.) qanoq pineqarsimanersoq nassuiarneqarsinnaanngitsoq.
Upalungaarsimanermik suliallit uliakoornermik tallimanngormat kalerrinneqaramik milluaatinik siaartiteripput, uuliaakoorummulli immiivitsik ajutoorutigisimavaat.
Umiarsualiviullu eqqaani iluliaqarmat uuliamik milluaanissaq aamma ajornakusoorsimavoq, Maniitsumi qatserisartut ulluinnarni aqutsisuat oqaluttuarpoq.
Aammattaaq umiarsualiviup eqqaani iluliaqarmat uuliaanik katersinissaq ajornakusoorsimavoq, Maniitsumi qatserisartut aqutsisuata Jørgen Lyngep KNR-imut oqaatigaa.
Umiarsualiviup eqqaani Iluliaqarnera uuliamik saliiniarnermut ajoqutaagaluartoq, uuliakoorneq nakkutigineqarluarpoq, Jan Zachariassenip oqaatigaa.
- Uuliakoorneq soorunami nakkutigaarput. Maniitsumilu qatserisartut upalungaarsimasullu suleqatigilluarlugit, aqutsisoq oqarpoq.
