USA-p nunanut allanut ministeria, Marco Rubio, USA-mi innuttaasut sinnerlugit sinniisoqarfianni tusarniaanermi Kalaallit Nunaata Danmarkimut ataneranik ilisimanninnersoq pingasunngormat aperineqarpoq.

- Maannamut, taanna akivoq.

Tusarniaanermi USA-p, Kalaallit Nunaata Danmarkillu akornanni isumaqatigiinniarnerit maanna pisut "pitsaasumik inissisimaffeqartut" aamma oqarpoq.

USA-mi Kongressimi ilaasortap, Sarah McBridep, Rubio Kalaallit Nunaat pillugu aperaa.

McBride demokratiusoq Delawarelu sinnerlugu qinigaasoq aperivoq USA "nunamik Natop iluaniittumik illersuiniarluni piginnittuusariaqarnersoq?“

Rubio apeqqummut ima akivoq:

- Ataatsimut illersorniarluta Kalaallit Nunaata atorneqarsinnaanera, Kalaallit Nunaat Danmarkilu oqaloqatigaagut.

- Missilinut illersornissamut pingaaruteqarpoq, maannakkulli oqaloqatigiissutigaagut. Isumaqarpungalu maannakkorpiaq oqaloqatigiilluarluta.

Trump isumaqatigigaa

McBride Amerikamiut politikkeriinit aallartitat, Danmarkimut Kalaallit Nunaannullu tapersersuinertik takutinniarlugu, Danmarkimut januaarimi tikeraartunut peqataavoq.

Demokratiusup Rubio USA-p præsidentiata Donald Trumpip siornatigut oqaaserisimasaanut tunngatillugu aperaa.

Rubiop Trumpip sumiiffik pigalugu illersoruminarneruneranik oqarnera isumaqataaffiginerarpaa.

- Præsidenti isumaqarpoq, oqartussaassuseqaraanni tamakkiisumillu aqutsigaanni illersoruminarnerusoq.

- Soorunami Kalaallit Nunaat Danmarkilu oqaloqatigaagut. Qaammatit tamaasa maannamut oqaloqatigisarpagut. Isumaqarpunga piffissap ilaani tamanna pillugu nutaarsiassaqarluarumaartugut, USA-p nunanut allanut ministeria oqarpoq.

McBridep USA-mi naalakkersuisut piginnittuuneq illersornissaqarnermut attuumassuteqartilermatigit, naalakkersuisut Natop isumaqatigiissutaani immikkoortoq 5-imik unioqqutitsinerarlugit tamakkua pineranni pisuutippai.

Natop illersornissamut isumaqatigiissutaani immikkoortoq 5-imi allaqqavoq, Natomut ilaasortaq ataaseq saassunneqarpat, tamanna Natomi ilaasortanut tamanut saassussinerussasoq.

Naalakkersuisoq qisuariartoq

Rubiop USA-p Natomut suli ilaasortaanera erseqqissaassutigaa oqarlunilu Trump Natop Tyrkiami ataatsimeersuarnissaanut peqataajumaartoq, aammali oqarpoq Nato allanngortariaqartoq.

Nunanut allanut tunngasunut naalakkersuisup, Múte B. Egedep (IA),  Facebookikkut pingasunngornermi unnukkut allakkamini Amerikamiut nunanut allanut ministeriata oqaaseqaatai qisuariarfigai.

- Nunatta siunissaa, uatsinnit nunatsinni aalajangerneqassaaq. Qaqugumulluunniit tamanna allanngornavianngilaq aamma USA-miit oqariartuutit qanorluunniit ikkaluarpata, taanna allappoq.

USA-mik Danmarkimillu oqaloqateqarnerit "kinguneqartussamik tamanullu ataqqinnittumik“ ingerlatiinnarneqarnissaat taassuma kajumissaarutigaa.

Nunanut allanut ministeri Lars Løkke Rasmussen (M) USA-p illoqarfiisa pingaarnersaannut januaarimi tikeraarmalli Danmarkip, Kalaallit Nunaata USA-llu akornanni isumaqatigiinniartoqalerpoq.

Trumpip Kalaallit Nunaat Amerikamiunit pigineqalernissaa kissaatigalugu arlaleriarluni erseqqissarpaa.

Trumpip Kalaallit Nunaanni illoqarfik qulangeqqallugu isigalugu assiliaq, inoqatinut attaveqaqatigiittarfiutimini Truth Socialimi maajip naanerani saqqummiuppaa.

Assimi allaqqavoq “Hello, Greenland" - kalaallisut nutserlugu "Haluu, Kalaallit Nunaat".

/ritzau/