Kalaallit Savalimmiormiullu OL-imut peqataatitaat ataatsimiititaliamit itigartinneqartut

Danmarkimi naalakkersuisunngortut anguniagaat siulleq iluatsinngitsoorpasippoq.

Kalaallit Nunaata Savalimmiullu namminersortutut, tassa danskit erfalasuat atornagu OL-imut peqataasinnaanissaat sulissutigineqarnissaa pilersaarutaagaluarpoq.

Taamatulli pisoqannginnissaa pillugu IOC-p KNR-imut allakkatigut ima akissuteqarfigaa:

- IOC-p Savalimmiut Kalaallillu Nunaallu nunatut immikkut  namminneerlutik National Olympiske Komiteqarnissaat, ataatsimiititaliaqarnissaat akuerisinnaanngilai, komite allappoq.

Folketingip siulittaasoqarfiata IOC juunip 18-ianni allaffigimmagu, Kalaallit Nunaat Savalimmiullu OL-ertoqarnissaanut nunatut namminersortutut akuerineqarnissaat tassani kaammattuutigalugu, taama akissuteqarpoq.

Erseqqissumik itigartitsineq

Nunanut allanut ministeri Lars Løkke Rasmussen (Moderaterne) Savalimmiut assammik arsarnermi OL-imut annguppata malittarisassalli maanna atuuttut pissutigalugit peqataasinnaanngikkunik, tamanna inuiaqatigiinnit Danmarkimut pikitsitsinermik kinguneqarsinnaanera Politikenimut oqaluttuaraa.

IOC-lli Kalaallit Nunaannit Savalimmiuniillu immikkut eqimattaqartoqarsinnaannginneranik siornatigut nassuiaateqartareernertik tunngavigaa:

- Taamatut inissisimasoqarnera illuatungeriinnut pineqartunut ukiuni kingullerni arlaleriartumik nassuiaatigineqareerpoq oqaatigineqareerlunilu, IOC oqaluttuarpoq. 

Kalaallit Nunaat nammineq erfalasuni atorlugu OL-imut 2006-imili peqataarusuppoq, tamannali periarfissaannginnera IOC-mit taamanili akissutigineqarpoq.

IOC-p maanna aamma nassuiarpaa, nunat FN-imit namminersortutut akuerineqaraangata aatsaat OL-imut peqataasinnaasutut, National Olympic Committeetut, akuerisaasartut.

- Malittarisassat taakku 1996-imiilli atuupput IOC-llu taakkua minitaqarnani maleruartuarpai.

Naalakkersuisut suliaq ingerlatiinnassagaat

KNR-ip IOC-p Kalaallit Nunaata Savalimmiullu OL-imut eqimattatut immikkut peqataasinnaanerannik itigartitsineranut nunanut allanut ministereqarfik qanoq isumaqarnersoq paaserusullugu saaffigaa.

Ministereqarfiup Kulturimut ministeriaqarfik, timersornermut akisussaasoq, innersuussutigaa.

KNR-illi tamanna sulinermut qanoq sunniuteqarnissaa pillugu apeqqutaa Kulturimut ministereqarfimmit akineqanngilaq. Ministereqarfilli ima allappoq:

- Savalimmiut Kalaallit Nunaatalu IOC-mut ilaasortanngornissaat naalakkersuisut sulissutigissavaat.