Bonusit ineqarnermullu akiliutsinneq danskinik peqqissaasunik nunatsinni sulilersitsissasut

Danskit peqqissaasut nunatsinni sulisilerniarlugit sulinermi atugassarititaasut pillugit isumaqatigiissutip imai maanna inissipput.

Dansk Sygeplejeråd tusagassiuutinut sisamanngormat nalunaarummi taama paasissutissiivoq.

Nunatsinni peqqinnissaqarfimmi sulilertussat nikittaallutik sulinerminnut atatillugu bonusinnattassapput.

Taakkununnga akissarsiat soraarnerussutisiassaqarnerullu saniatigut aalajangersimasumik akissarsiat 15 procentiinik amerlassusillit soraarnerussutisiaqarnissamut akiliutigineqartarnissaat ilaavoq.

Peqqissaasut nunatsinni sulinertik naammassigunikku 15 procentit taakkua amerlassusaat tamaat ataatsikkut aamma tigusinnaavaat.

Tamatuma saniatigut aamma peqqinnissaqarfimmi sulisunut atugassarititaasut nalinginnaasut isumaqatigiissummiittut, Dansk Sygeplejeråd paasissutissiivoq.

Ilaatigut nunatsinni ineqarnermut akiliutsillutik ineqartinneqarsinnaassapput, taavalu siumut utimullu timmisartornerit akilerneqassallutik.

- Kalaallit Nunaanni sulinissamik soqutigisaqaraanni sulisunut sinniisumik siuttumilluunniit attaveqarluni qanoq periarfissaqarnersoq paasiniaanissaq kajumissaarutigissavara.

- Maannakkut aallarnissaq pilerinarnerulerpoq, Dansk Sygeplejerådip siulittaasua Dorthe Boe Danbjørg tusagassiuutinut nalunaarummi oqarpoq.

Nunatta peqqinnissaqarfia pinasuagassanut, peruluttunut kræftertunullu immikkoortortaqarfinni peqqissaasunik amigaateqarfiusoq nikittaalluni sulisarnissamut isumaqatigiissuteqarniartuuvoq.

PK-mit nuannaarutigineqartoq

Peqqissaasut Kattuffianni siulittaasup Navarana Johansenip isumaqatigiissut nuannaarutigaa. Maannakkut ajornartorsiummut aaqqeeqataasinnaasoq, taanna isumaqarpoq.

Piffissamulli ungasinnermut ajornartorsiutinik aaqqiissutaasinnaanersoq nalileruminaatsillugu ilanngullugi oqarpoq.

Dansk Sygeplejerådilu tamatumunnga isumaqataavoq.

- Naalagaaffeqatigiiffimmiittunut tamanut naammattunik peqqinnissaqarfimmi sulisoqarnissaq pillugu piffissamut ungasinnermut aaqqiissutissarsisoqarnissaa pisariaqarpoq, Dorthe Boe Danbjørg oqarpoq.

Isumaqatigiissut 2029-p naanissaanut atuutissaaq.

Nunatta peqqinnissaqarfia Danmarkillu qitiusumik immikkoortui politikkikkut isumaqatigiissuteqartut, Dansk Sygeplejeråd Danmarkillu qitiusumik immikkoortui atugassarititaasunut isumaqatigiinniartuupput.