Atlantikup Avannaani sinniisut sapaatip-akunnerata tulliani ataatsimiigiaqqusaasut
Folketingimut qinigaaqqammersut marluk, Naaja H. Nathanielsen (IA) aamma Qarsoq Høegh-Dam (N), ullorsiutiminni maanna ulluliisinnaanngorput.
Mette Frederiksen, maanna ministeriunerugallartoq kunngikkormiunilu misissuisartuusoq, Danmarkimi naalakkersuisunik nutaanik pilersitsiniarluni isumaqatiginninniarluni aallartippoq. Socialdemokratiet tusagassiuutinut nalunaarummi taama allappoq.
Kunngikkormiunut misissuisoq tassaavoq politikkeri qinersinerup kingorna naalakkersuisunngortitsinissaq pillugu isumaqatiginninniarnernik aqutsisoq.
Ataatsimiinnerit aqagu tallimanngornermi aallartissapput sapaatillu akunnerata tulliani nanginneqaqqissallutik. SF, Enhedslisten, Radikale, Alternativet, Moderaterne, Venstre aamma Konservative aqagu ataatsimiinnissanut aggersagaapput.
Atlantikup avannaata sinniisui illuatungeriittut sapaatip-akunnerata tulliani ataatsimeeqatigiinnissamut qaaqquneqarput.
Naaja H. Nathanielsen aamma Qarsoq Høegh-Dam kalaallit folketingimi ilaasortaatitaraat, Anna Falkenberg Sambandsflokkurinimeersoq aamma Sjúrður Skaale Javnaðarflokkurinimeersoq Savalimmiormiut folketingimi ilaasortaatitaattut inissipput. Taakkua qinigaaffimmi qaangiuttumi ilaasortaareerlutik marlunngornermi qinersinermi qinigaaqqipput.
Politikkikkut oqaaseqartartut arlallit isumaqatigiinniarnerit ajornakusoorlutillu sivisusinnaassasut ilimagaat. Atlantikup avannaata sinniisui qinersinermi aalajangiisuusinnaanersut nalunarallarpoq.
