Boassenip Berthelsenillu oqqannerat politiinut nalunaarutigineqartoq

Naqqiissut: KNR ilanngutassiap saqqummersinneqarnerata kingorna Kalaallit Nunaanni politiinit attavigineqarpoq, tassanilu politiit inunnut ataasiakkaanut tunngatillugu nalunaarutiginninnernik uppernarsarnaasinnaanatillu eqqunnginneraasinnaanngitsut oqaatigaat. Taamaammat KNR-ip ilanngutassiap aallaqqaasiutitut naalisarnera allanngortippaa.

Nuummi neriniartarfiup Unicornip silataani inuit tusaamaneqartut marluk tallimanngornermi unnukkut oqqatilerput, pisorlu politiinit maanna misissuiffigineqarpoq.

Politikeri Per Berthelsen (D) politikkimik suliaqarnerup ukioq manna  naammassineqarnera nalliussiniarlugu nulianilu unnuk taanna neriartoqatigiipput.

Nereqatigeereerlutik Per Berthelsenip taxat utaqqiartorlugit silamut anillannerani, Jørgen Boassen aamma Kuno Fencker (N) biilinit niupput, taava Jørgen Boassen aamma Per Berthelsen oqqatilerput.

Inuit taakku marluk taama pisoqarsimanera ilumoornerarpaat; isumaqataaffiginninneralli tassunga killeqarpoq.  

Taakku marluk KNR-imit oqaloqatigineqarput.

Tamanut saqqumisumi oqqanneq

Jørgen Boassenip oqarnera naapertorlugu, Per Berthelsenip Boassen Facebookikkut nikanarsarlugu piffissami sivitsortumi allaaserisarsimavaa.  

Facebookkip oqaaseqartarfiatigut siusinnerusumi assortuuttarsimanertik aamma Per Berthelsenip KNR-imut oqaluttuaraa.

Jørgen Boassen biilinit niugami politikeri kiinarsiniarlugu ornippaa.

- Taava oqarfigaara, kiisami maanna periarfissaqalersoq; Facebookikkut nikanarsaaginnarnani toqqarlunga taamaaliorsinnaanngornerarlugu. Nilliallunga taama oqanngilanga, erseqqissumilli oqarpunga.

Kinali saassussiniarpalaarsimanersoq taakku isumaqatigiinngissutigaat. 

- Jørgen Boassenip uumillerluni qanillivillunga akerartorpaanga, ima qanitsigaagut qingagut attuutingajallutik, Per Berthelsen Facebookimi allappoq. 

Per Berthelsenimut qanillattorsimanerarneqarnini Boassenip nammineerluni ilumuunnginnerarpaa. Namminerli oqarneratut politikeri imminut aqussinnaasimanngilaq.

- Kamangaarmat nilliaffigalungalu, nuliata naavisa nalaatigut eqeqqavaa, Jørgen Boassen oqarpoq.

Per Berthelsen Facebookikkut unnuk taanna allappoq:

- Tillungajavikkaluarlugu peeqqullugu nipituumik oqarfigaara.

Akerleriit immikkoorlutik ingerlammata pisoq unippoq.

Politiinut nalunaarutiginninneq

Akerleriit politiinut attaveqarsimannginnerarput, politiinulli nassuiaateqarsimanertik tamarmik oqaatigaat, sumiiffiup eqqaaniittut ilaat politiinut nalunaaruteqarsimammat. 

Unnuk taanna pisimasumik misissuisoqarnera, Kalaallit Nunaata Politiivinit KNR-imut uppernarsarneqarpoq. 

Kuno Fencker tamatuma kingorna oqaluttuarpoq, nammineq misigisani oqaluttuariniarlugu Per Berthelsen pingasoriarluni pissarsiariniarsarisimagaluarlugu.

Per Berthelsenip Kuno Fenckerimik oqaloqateqarusussimannginnini KNR-imut ilumoornerarpaa. 

Suliami qanoq pisoqarnissaa politiinit aalajangigassaasoq Kuno Fenckerip, Jørgen Boassenip Per Berthelsenillu tamarmik oqaatigaat.