Nunanut allanut sillimaniarnermullu ataatsimiititaliap siulittaasuata Pipaluk Lyngep (IA) nunatta nunanut allanut tunngasunut periusissiap nutarterneqartariaqarnera juunip naanerani oqaagtigaa. 

Donald Trumpip Kalaallit Nunaat præsidentinngoreerluni eqqartoqqereeraalu taama kissaateqarpoq. 

- Nunarsuarmi pissutsit allanngornerat aamma siunissami pissutsit nalorninarnerat pissutigalugit, periusissiaq ukiut ataatsip matuma siorna akuersissutaagaluartoq, tulluussaqqinneqartariaqarsoraara, Pipaluk Lynge oqarpoq.

Taamaammat taanna periusissiap isumaqatiginniutigineqarnissaanut tunngatillugu oktobarimi paragraf 37-mut apeqquteqaateqarpoq.

- Nunanut allanut politikimut periusissiatta nutarternissaanut Naalakkersuisut qaqugu aggersaanissaq eqqarsaatigaat?, taanna aperivoq.

Pipaluk Lynge (IA)nunanut allanut sillimaniarnermullu periusissiaq nutarterusullugu juunip naanerani oqarpoq. Isumaqatigiinniarnerilli suli aallartinngillat. Assi © : KNR/Morten Heilmann

 Vivian Motzfeldt (S), nunanut allanut tunngasunut naalakkersuisoq, qaammammi tulliuttumi akissuteqarpoq. 

- Periusissiaq suli naapertuuttutut Naalakkersuisut isigaat, taamammallu nunanut allanut tunngasunik periusissiamik nutaarluinnarmik isumaqatiginninniarnissanik aallartitsissanatik. Periusissialli ilaanik attuumassuteqartunik isummerfigeqqinnissaannik pisariaqartitsisoqarnera takusinnaavaat, taanna akissuteqarpoq.

Periusissiallu nalilersoqqineqarnissaa naalakkersuisup isumaqataaffigigaluarlugu, isumaqatiginninniarnerit qaqugukkut aallartinneqarnissaat erseqqissumik oqaatiginngilaa.

Vivian Motzfeldtip allannguinissamut pisariaqartitsineq KNR-imit apersorneqarnermini sukumiinerusumik maanna oqaasertalerpaa.

Allannguutit annertunavianngillat

Sakkutooqarnerulernerup Danmarkimullu isumaqatigiissutit nutaat sakkutooqarnikkut piginnaanngorsaanermut imaluunniit atortunik pitsanngorsaanermut ersiutaanersut, ukiup ingerlanerani oqallisigineqarpoq 

Sakkussakillisaaneq eqqissinerlu periusissiami pingaartinneqarput; oqaatsit taakku qulingiluariarlutik 26-riarlutillu atorneqarput.

Sakkutooqarnikkut iliuuseqartoqaqqissappat tamanna Issittumi sakkussakillisaanissaq qulakkeerniarlugu pissasoq, Nunanut allanut sillimaniarnermullu politikkimut periusissiami allaqqavoq.

- Tunngaviusumik sakkutooqarfiit amerlanerusut piumanngilavut, sakkutuulersornerilli sakkussakillisaanermut aqqutaasariaqarput, periusissiami allassimavoq.

Nunarsuarmi pissutsit ullut tamaasa allanngorartut, Vivian Motzfeldt oqarpoq illersornissaqarnermullu tunngasunik oqaloqatigiinneq aamma ullut tamaasa pisoq.

- Aqagussap suunera soorunami naatsorsorneqarsinnaajuaannanngilaq, kisianni pissutsip qanoq ineriartornera malinnaavigaarput, peqataaffigalugulu. 

- Pingaarnerpaatullu aamma soorunami nunarput uunga killitsinneqassanngilaq, qaqugukkulluunniit illersorsinnaassusaa appasinnerpaaffianiitissallugu, taanna oqarpoq.

Vivian Motzfeldtip (S) USA-p aallartitaa Ken Howery ataasinngornermi decembarip 8-anni naapippaa. Assi © : Markus Valentin / KNR

Sakkussiat pillugit piginnaanngorsarnissamut Pipaluk Lyngep aallaqqaammulli, Nunanut allanut sillimaniarnermullu periusissiap nalilersoqqinneqarnissaa piumasaraa. Sioorassutinut naleqquttunngorlugu qaqugu taanna suliarilissavisiuk? 

Ullumikkumut allanngortitassat naleqqussagassat, nunarsuarmi allanngoraqisumi pisariaqarsinnaasut aallaavigalugit  oqaloqatigiinnerit piffissami qaninnerusumi aallartittussaassavagut, Vivian Motzfeldt akivoq.

Periusissiaq annertuumik allanngortinneqartariaqanngitsoq naalakkersuisoq isumaqarpoq. Tamannarpiarlu, periusissiaq ataatsimut isigalugu taamaatut naammassineqarnera partiinillu sisamanik tunuliaqutaqarnera pissutigalugu, Kalaallit Nunaata nunanut allanut sillimaniarnermullu politikkia nunanut allanut paasiuminarnerussaaq.

- Takorluunngilara annertoorujussuarmik allanngortoqassasoq.

- Taamaammat nalilersorneqarsinnaasut nutaat nalilersuutigalugit, nutarterneqartariaqassappallu nutartertuarlugu, kisianni tunngaviusumik tunngavippiai allanngortinnagit sulinerput ingerlatissagipput naatsorsuutigivara, taanna oqarpoq.

Vivian Motzfeldtip (S) apersorneqarnera tamaat takuneqarsinnaavoq uani: 

Isumaqatiginninniarnerit arriitsut

KNR-ip Nasiffimmi pisortaq Rasmus Leander politikkerit periusissiamik qanoq allannguisinnaanerat pillugu oqaloqatigaa.

“Kalaallit aallartitaat” oqaloqatigigaangamigit, taakku – naalakkersuisup oqarnera assigalugu – oqartarput pilersaarutinik allannguerujussuartoqarnissaa naatsorsuutiginagu.

- Isumaqatiginninniartartut qanoq kissaateqarnersut apeqqutaaginnarpoq, isumaqatiginninniarnerillu suli aallartinngillat, Rasmus Leander oqarpoq.

Rasmus Leander, Nasiffimmi ulluinnarni aqutsisuuvoq. Taanna isumaqarpoq naalakkersuisut periusissamik nutaamik isumaqatiginninniarnissaasa sivisuallaarneranut pissutaasut pingasuusinnaasut: Ulapinneq, USA-mut tunngatillugu pissutsit aamma partiit suut allanngortikkusunerlugit suli aalajangersimannginnerat. Assi © : ILISIMATUSARFIK

Isumaqatiginninniarnerit qaqugu aallartissanersut suli tusagaqarfiginngilaa, ilimanarporli ukioq nutaaq sioqqullugu isumaqatigiinniarnernut pilersaarut naammassineqarumaartoq.

Naalakkersuisut - ulapinnerat eqqaassanngikkaanni - USA-mut tunngatillugu unammillerneqarsimanerat, siusinnerusukkut aallartinnginnerannut pissutaasinnaavoq, taanna oqarpoq.

- Oqallinneq mianernartuuvoq, periusissiallu ammaqqinneqarnissaa arlalitsigut pingaaruteqarpoq, aammali arlalinnik mianernartoqarpoq, Rasmus Leander oqarpoq.

Allannguutaasinnaasut

Allannguutinut piviusunut tunngatillugu Rasmus Leander isumaqarpoq EU-p USA-minngaanniit periusissiami peqataatinneqarnerunissaa siusinnerusukkut eqqarsaatigisimaneqarsimasinnaagaluartoq.

- Inuussutissarsiornermut aningaasaliissuteqarnerunissamik kissaateqarneq attuumatillugu taamaaliortoqarsimasinnaavoq, taanna oqarpoq.

EU-lli ukiumut tapiissutigisartakkatik marloriaatinngortinneqarnissaat siunniummassuk aatsitassarsiornermilu suliniutini soorlu Greenland Resourcesimi aningaasaleereermata, EU-mut taamanili qanillisoqareermat, EU periusissiamut ilanngunneqarnissaanut siunertarisap annerpaartaa anguneqareerpoq.

- Suleqatigiinnerulerusunnerup EU-mut takutinnissaa takorloorneqarsimasinnaagaluarpoq. Tassuunali iluatsittoqalaareerpoq. 

Partiit kissaataat

Naak partiit naalakkersuisooqatigiit sisamasut taakkua periusussiaq isumaqatigiinniutigeqqittussaagaluaraat, tamanna ima paasisariaqanngilaq, partiit tamarmik nunanut allanut politikkimut tunngatillugu erseqqissumik isummertuusut, Rasmus Leander naliliivoq.

- Nunanut allanut politikkimut tunngatillugu partiit akornanni tunngaviusumik isumaqatigiittoqarpasinngilaq, taanna oqarpoq.

Taamaattumik partiit isumaqatigiinniarnerit aallartinnginneranni allanngortitserusutaminnik erseqqissaanissartik maanna pisinnaaffigigaat, Nasiffimmi aqutsisoq isumaqarpoq.

- Periusissiarmi allanngortinniaannarlugu allanngortitassaanngilaq.